Në përputhje me dokumentet e planifikimit hapësinor dhe me qëllim të realizimit të projektit infrastrukturor në qendrën e qytetit të Lipjanit, përkatësisht realizimin e projektit “Ndërtimi i parkingut nëntokësor, parkut qendror të qytetit, nënkalimit dhe vazhdimin e ndërtimit të sheshit”, Komuna e Lipjanit që nga fundi i vitit 2022 ka filluar me procedurat përkatëse ligjore.
Ky projekt me 4 pozicione realizohet në tërësi vetëm në kuadër të pronave komunale dhe një prone private të shpronësuar me kohë. Në disa pjesë të pronave komunale kanë qenë disa objekte mbi të cilat persona të caktuar e kanë pasur të drejtën e posedimit të tyre. Prandaj Komuna e Lipjanit ka shpronësuar vetëm objektet, sepse prona ku janë ndodhur ato objekte është e Komunës së Lipjanit. Rast i tillë është edhe prona (komunale) ku gjendet objekti për të cilin u pengua rrënimi i tij më datën 09.07.2026.
Mbi këtë bazë si dhe duke u mbështetur në Ligjin Nr. 03/L-139 për Shpronësimin e Pronës së Paluajtshme, Gazeta Zyrtare e Republikës së Kosovës Nr. 52/08 Maj 2009 i ndryshuar dhe plotësuar me Ligjin Nr. 03/L-205 Gazeta Zyrtare e Republikës së Kosovës Nr. 91/10 Dhjetor 2010, Komuna e Lipjanit ka marrë Vendim për Miratimin e Shpronësimit për Interes Publik 01Nr.464/01-53706 të datës 04.10.2022 dhe Vendimin plotësues 01Nr.464/01-53706/2 të datës 11.10.2022 lidhur me realizimin e projektit të shpronësimit për secilin pronar-bashkëpronar, pronat të cilat ndikohen nga ndërtimi i projektit. Ndërlidhur me këtë janë ndërmarrë veprimet procedurale si në vijim:
• Njoftimi për dëgjimin publik lidhur me inicimin e procesit të shpronësimit, i mbajtur më datën 12.10.2022 në sallën e Kuvendit Komunal;
• Vendimi Preliminar për shpronësimin e objekteve 01Nr.464/01-53706, datë 30.11.2022;
• Kërkesa e datës 14.10.2022 1Nr.464/01-56232 për vlerësimin e pronave që janë objekt i shpronësimit në Departamentin për Tatimin në Pronë në kuadër të Ministrisë së Financave, Punës dhe Transfereve, si dhe plotësimi i dosjes 01Nr.464/01-57051 i datës 06.12.2022;
• Raporti i Vlerësimit 1Nr.464/01-10231 i datës 24.02.2023 nga Departamenti për Tatimin në Pronë – Ministria e Financave, Punës dhe Transfereve;
• Vendimet Përfundimtare Individuale 01Nr.464/01-53706 datë 29.03.2023 për secilin pronar/bashkëpronar, të cilat iu janë dorëzuar secilit prej tyre;
• Kryerja e pagesave sipas vlerësimit të objekteve të bërë nga Ministria e Financave. Katër pagesa i kanë pranuar pronarët e objekteve, kurse për gjashtë pronarët e tjerë mjetet financiare janë deponuar në Bankën Qendrore të Kosovës;
• Aktet tjera administrative lidhur me rregullimin e çështjeve statusore të objekteve në dokumentet kadastrale dhe lidhur me rrënimin e tyre;
• Njoftimi lidhur me lirimin e banesës Nr.01-464/01-41439 të datës 19.08.2024;
• Aktgjykimi CN.nr.69/22, datë 24.03.2025 nga Gjykata Themelore në Prishtinë – Dega në Lipjan;
• Aktvendimi CAJK Nr.154/2025, datë 17.03.2026 i Gjykatës së Apelit të Kosovës në Prishtinë, me të cilin është vërtetuar Aktgjykimi i shkallës së parë lidhur me të drejtën e shpronësimit të objekteve.
Vetëm pasi Komuna e Lipjanit ka zhvilluar procedurat përkatëse ligjore, atëherë në procedurë të hapur ka kontraktuar punimet për “Ndërtimin e parkingut nëntokësor, parkut qendror të qytetit, nënkalimit dhe vazhdimin e ndërtimit të sheshit”.
Procedurat e shpronësimit janë kryer para lidhjes së kontratës me punëkryesin për ndërtimin e parkingut.
Prona është komunale, jo e individëve të caktuar, siç po deklarojnë në media dhe ne i ftojmë të dokumentojnë pronësinë e tokës, ndërsa çështja e banesave dhe lokaleve është shpronësuar, madje disa pronarë kanë marrë edhe kompensimin. Për qytetarët e Lipjanit ju rikujtojmë që i njëjti proces dhe në të njëjtën kohë është zhvilluar edhe për disa objekte të vjetra që kanë qenë mbrapa objektit të vjetër të Komunës.
Komuna e Lipjanit ka vepruar në përputhje të plotë me legjislacionin në fuqi, prandaj do të vazhdojë me realizimin e projektit.
Pronarët e objekteve janë kompensuar sipas vlerësimit nga Ministria e Financave – Departamenti i Tatimit në Pronë dhe komuna ka kryer obligimet financiare ndaj secilës palë në këtë çështje.
Më 10.07.2026
Komuna e Lipjanit
