Komuna e Lipjanit shpreh keqardhje që një medium ka publikuar informacione të pasakta dhe pretendime të pabazuara lidhur me procesin e shpronësimit dhe realizimin e projektit “Ndërtimi i parkingut nëntokësor, parkut qendror të qytetit, nënkalimit dhe vazhdimin e ndërtimit të sheshit”, duke krijuar një pasqyrë të shtrembëruar për opinionin publik.
Për hir të informimit të drejtë të qytetarëve, sqarojmë se ligjshmëria e procesit të shpronësimit është konfirmuar nga Gjykata Themelore në Prishtinë – Dega në Lipjan, po ashtu është vërtetuar me aktgjykim të Gjykatës së Apelit në vitin 2025. Prandaj pretendimet që vënë në dyshim ligjshmërinë e këtij procesi nuk qëndrojnë dhe bien ndesh me vendimet e formës së prerë të gjykatave kompetente.
Lidhur me ekspertizën e përmendur në raportim, Komuna e Lipjanit ka iniciuar procedurë disiplinore ndaj ekspertit pranë Ministrisë së Drejtësisë, si dhe ka kërkuar zëvendësimin e tij për shkak të mungesës së profesionalizmit dhe sjelljes në kundërshtim me standardet e etikës profesionale. Rrjedhimisht paraqitja e një ekspertize të tillë si fakt përfundimtar është e pasaktë dhe nuk pasqyron gjendjen reale procedurale.
Po ashtu dokumentacioni zyrtar kadastral, përkatësisht fletët poseduese, dëshmojnë qartë se toka mbi të cilën realizohet projekti është pronë e Komunës së Lipjanit. Pas përfundimit të procedurës së shpronësimit, edhe njësitë banesore kanë kaluar në emër të Komunës, në përputhje me procedurat ligjore dhe regjistrimet përkatëse.
Është po ashtu i pasaktë pretendimi se projekti konsiderohet i përfunduar. Përfundimi i një projekti publik nuk përcaktohet nga pretendimet e palëve, por nga realizimi i plotë i projektit sipas projektit kryesor dhe pranimi teknik i punimeve. Projekti është ende në fazën e realizimit dhe do të konsiderohet i përfunduar vetëm pas përmbylljes së të gjitha punimeve të parapara, përfshirë rrënimin e objekteve të mbetura dhe finalizimin e të gjitha elementeve të projektit.
Komuna e Lipjanit mbetet e përkushtuar ndaj transparencës dhe informimit të saktë të opinionit publik. Njëkohësisht u bëjmë thirrje mediave që para publikimit të pretendimeve që cenojnë institucionet dhe interesin publik, të verifikojnë faktet në dokumentacionin zyrtar dhe të respektojnë standardet profesionale të raportimit.
Për çdo sqarim shtesë, mediat dhe qytetarët mund t’i drejtohen Komunës së Lipjanit nëpërmjet kanaleve zyrtare të komunikimit.
