Nënkryetari i Komunës së Lipjanit, z. Diamant Bytyqi, sot ka pritur në takim përfaqësuesen e Fondacioni Jahjaga, znj. Arlinda Zaimi, me të cilën ka nënshkruar Marrëveshje Mirëkuptimi për bashkëfinancimin e projektit “Gratë në Agrikulturë”, me qëllim mbështetjen e ndërmarrësisë dhe trajnimeve profesionale për gratë në Komunën e Lipjanit.
Me këtë rast Nënkryetari Bytyqi, theksoi se mbështetja e grave në ndërmarrësi mbetet prioritet institucional.
“Komuna e Lipjanit mbështet çdo marrëveshje dhe iniciativë që ka për qëllim fuqizimin ekonomik të grave dhe zhvillimin e qëndrueshëm. Ky projekt ofron mundësi konkrete për zhvillimin profesional të grave dhe rritjen e pavarësisë së tyre ekonomike”, tha Nënkryetari z. Diamant Bytyqi.
Përfaqësuesja e Fondacionit Jahjaga, znj. Arlinda Zaimi, falënderoi Komunën e Lipjanit për bashkëpunimin dhe mbështetjen në realizimin e këtij projekti, duke theksuar rëndësinë e partneritetit institucional në krijimin e mundësive të reja për gratë ndërmarrëse.
Projekti synon fuqizimin socio-ekonomik të grave përmes ngritjes së kapaciteteve profesionale dhe ofrimit të mbështetjes konkrete. Programi përfshin trajnim teorik dhe praktik, të hartuar sipas nevojave dhe aftësive individuale të përfitueseve, si dhe mbështetje të drejtpërdrejtë për zhvillimin e aktiviteteve të tyre ekonomike.
Projekti financohet nga Misioni i Administratës së Përkohshme të Kombeve të Bashkuara në Kosovë dhe implementohet nga Fondacioni Jahjaga, me bashkëfinancim dhe mbështetje nga Komuna e Lipjanit.
