Nënkryetari i Komunës së Lipjanit, z. Diamant Bytyqi, sot ka pritur në takim Grupin e Auditimit Social, ku janë prezantuar gjetjet dhe rekomandimet për katër projektet infrastrukturore të monitoruara në kuadër të procesit të Auditimit Social.
Gjatë takimit, përfaqësuesit e Institutit Demokraci Plus dhe organizatës YAHR, prezantuan rezultatet e punës dhe propozimet për përmirësimin e zbatimit të projekteve.
Nënkryetari Bytyqi falënderoi grupin e auditimit për angazhimin dhe bashkëpunimin, duke theksuar se Komuna e Lipjanit do t’i trajtojë me seriozitet gjetjet dhe rekomandimet, veçanërisht ato që synojnë rritjen e shfrytëzueshmërisë dhe përfundimin e plotë të projekteve publike.
Ndërsa kryesuesi i Grupit të Auditimit Social, z. Bekim Krasniqi, falënderoi Komunën e Lipjanit për bashkëpunimin e treguar dhe qasjen e shpejtë në dokumentet publike, të cilat mundësuan realizimin e Auditimit Social për projektet e monitoruara, të cilat janë financuar nga Granti i Performancës Komunale, ku Komuna e Lipjanit ishte fituese.
Procesi i Auditimit Social ka për qëllim të forcojë dialogun ndërmjet qytetarëve dhe komunës, të avancojë transparencën dhe llogaridhënien institucionale, si dhe të fuqizojë pjesëmarrjen aktive të qytetarëve në monitorimin e investimeve publike.
Në kuadër të këtij Auditimi Social janë monitoruar këto projekte infrastrukturore si “Ndërtimi i murit gabion në Gadime të Ulët”, “Shtëpia muze e veteranëve të UÇK-së në Krojmir”, “Rikonstruksioni i rrugës “Ajet Kozhani” Poturofc – Ribar i Madh” dhe “Rikonstruksioni i rrugës Dobrotinë – Sllovi”.
Ky aktivitet zhvillohet në kuadër të projektit “Fuqizimi i qytetarëve përmes Auditimit Social”, që implementohet nga Instituti Demokraci Plus (D+) dhe organizata YAHR Lipjan, me mbështetje nga programi DEMOS.
