Sot në sallën e takimeve të Komunës së Lipjanit, është mbajtur mbledhja e tretë për vitin 2026 e Këshillit Komunal për Siguri në Bashkësi KKSB, ku u diskutua për gjendjen e sigurisë në komunë.
Nënkryetari i Komunës së Lipjanit dhe njëherësh kryesues i KKSB-së z. Diamant Bytyqi, në fjalën hyrëse përshëndeti anëtarët e Këshillit dhe prezantoi pikat e rendit të ditës. Ai gjithashtu njoftoi të pranishmit se pjesa e dytë e takimit do të vazhdonte me një tryezë diskutimi të organizuar nga YAHR, me fokus në rolin dhe fuqizimin e KKSB-së.
Përfaqësuesi i Stacionit Policor në Lipjan z. Fehmi Haxholli, prezantoi pasqyrën e përgjithshme të gjendjes së sigurisë në komunë, vlerësoi se situata mbetet e qetë dhe stabile, si dhe theksoi rëndësinë e bashkëpunimit të vazhdueshëm ndërmjet Policisë dhe institucioneve lokale.
Gjatë takimit udhëheqësi i Njësisë së Zjarrfikësve në Lipjan z. Sadri Shamolli, prezantoi raportin për intervenimet e realizuara gjatë kësaj periudhe, duke u ndalur veçanërisht te ndërhyrja në rastin e djegies së gomave në afërsi të aeroportit, si dhe te rastet e tjera ku kanë intervenuar ekipet e zjarrfikësve.
Në vazhdim të mbledhjes drejtori i organizatës YAHR z. Bekim Krasniqi, prezantoi rolin dhe rëndësinë e Këshillit Komunal për Siguri në Bashkësi, duke theksuar nevojën për fuqizimin e tij dhe avancimin e bashkëpunimit ndërmjet institucioneve dhe mekanizmave relevantë.
Gjatë mbledhjes anëtarët e KKSB-së diskutuan për koordinimin ndërinstitucional dhe rëndësinë e bashkëpunimit ndërmjet institucioneve lokale dhe mekanizmave të sigurisë, në funksion të ruajtjes së sigurisë dhe mirëqenies së qytetarëve të Lipjanit.
