Komuna e Lipjanit respekton të drejtën e secilit për të shprehur mendimin dhe kritikat e tij, por vlerësimet duhet të mbështeten në fakte dhe në një pasqyrë të plotë të punës së realizuar.
Thirrja publike për aplikim ka qenë e publikuar dhe çdo qytetar ka pasur mundësi të ketë qasje në të. Gjithashtu, kontrata e përfituesit është publike dhe është e qasshme për çdo qytetar.
“Mërgata Fest & Sports” është një manifestim kulturor, sportiv dhe rekreativ, i cili zhvillohet përgjatë 7 ditëve, duke përfshirë 4 ditë aktivitete sportive dhe rekreative për fëmijë dhe 3 ditë program artistik e kulturor. Vlera e mbështetjes nuk ka të bëjë vetëm me aktivitetet sportive dhe kulturore, por edhe me mjetet dhe asetet e nevojshme për zhvillimin e këtyre aktiviteteve.
Në kuadër të aktiviteteve sportive dhe rekreative janë organizuar programe për fëmijë me shtëpi-kështjella, maskota, pikturim në fytyrë dhe lojëra argëtuese. Gjithashtu janë zhvilluar gara në pingpong (juniorë dhe seniorë), shah, bilardo, soccer flipper, arm wrestling, shigjetari dhe paragllajd, si dhe gara të veçanta për personat me nevoja të veçanta.
Në këto aktivitete kanë marrë pjesë fëmijë, të rinj, të rritur, kampionë vendorë dhe sportistë që përfaqësojnë Republikën e Kosovës në gara ndërkombëtare.
Programi artistik ka përfshirë mbi 25 artistë, duke promovuar emra të njohur të skenës muzikore, artistë lokalë dhe artistë nga mërgata. Në kuadër të manifestimit, më 5 gusht organizohet edhe “Sofra Tradicionale”, si promovim i trashëgimisë dhe vlerave tona kulturore, ndërsa nata finale përmbyllet me spektakël fishekzjarrësh.
Ky manifestim, në shenjë respekti dhe mirëseardhjeje për mërgatën tonë, po shndërrohet në traditë. Ai promovon qytetin, zhvillon sportin dhe kulturën, aktivizon fëmijët dhe të rinjtë, mbështet artistët lokalë dhe ata nga mërgata, gjallëron ekonominë lokale dhe sjell mijëra vizitorë që e frekuentojnë qytetin gjatë këtyre ditëve.
Duhet të kuptohet se kultura dhe sporti nuk janë shpenzim, por investim. Janë investim në fëmijët tanë, në të rinjtë, në talentet e reja, në shëndetin e qytetarëve, në promovimin e qytetit dhe në forcimin e jetës komunitare.
Kritika konstruktive është gjithmonë e mirëpritur, por një manifestim 7-ditor, me dhjetëra aktivitete sportive, rekreative, kulturore dhe artistike, nuk mund të reduktohet vetëm në “tri net muzikë”.
Investimi në këtë aktivitet dhe vetë pjesëmarrja e qytetarëve janë indikatorë të rëndësishëm të mirëpritjes dhe suksesit të tij. Komuna do të vazhdojë edhe në të ardhmen që t’i zhvillojë dhe t’i bëjë edhe më madhështore aktivitete të tilla.
Për çudi të njëjtit që po e kritikojnë “Mërgata Fest” në Lipjan, kanë kërkuar financimin e aktiviteteve të tilla edhe në lokalitete të tjera.
Qytetarët e Lipjanit dhe mërgata jonë meritojnë të kenë mundësi të shijojnë mbrëmje të mira muzikore dhe aktivitete të tjera. Ne i falënderojmë për frymën dhe gjallërinë që po i sjellin Lipjanit.
