Kryetari i Komunës së Lipjanit, z. Imri Ahmeti, sot ka vizituar Shkollën Fillore të Mesme të Ulët “Ismail Luma”, e cila së fundmi është përballur me përmbytje si pasojë e reshjeve të shumta që kanë prekur edhe komunën tonë.
Gjatë vizitës, Kryetari Ahmeti u informua nga afër për gjendjen në shkollë dhe për masat e ndërmarra për rikthimin e shpejtë të procesit të rregullt mësimor.
Me këtë rast, ai ka falënderuar Drejtorin e shkollës, z. Driton Sadiku, si dhe Drejtorin e DKA-së, z. Rasim Hasani, për reagimin e shpejtë dhe efikas, falë të cilëve objekti shkollor u pastrua në kohë rekord dhe mësimi u rikthye menjëherë në procesin e rregullt.
Kryetari Ahmeti theksoi rëndësinë e bashkëpunimit institucional në situata emergjente dhe ritheksoi përkushtimin e Komunës së Lipjanit për të garantuar kushte të sigurta për të gjithë nxënësit dhe stafin arsimor.
