Kryetari i Komunës së Lipjanit z. Imri Ahmeti, sot ka pritur në takim një delegacion nga Turqia, me të cilët ka diskutuar për mundësitë e investimeve në fushën e energjisë dhe përdorimin e teknologjive që kontribuojnë në kursimin e energjisë elektrike.
Gjatë takimit kryetari Ahmeti, i falënderoi për vizitën dhe interesimin, duke theksuar se Lipjani ofron mundësi të favorshme për investime në fushën e energjisë dhe është i hapur për bashkëpunim me partnerë të huaj.
“Sigurisht efikasiteti energjetik mbetet një ndër prioritetet në këtë fushë. Lipjani ka potencial për zhvillimin e projekteve energjetike dhe jemi të interesuar për bashkëpunim në zbatimin e teknologjive që mundësojnë kursimin e energjisë elektrike”, tha kryetari z. Imri Ahmeti.
Përfaqësuesit e delegacionit falënderuan kryetarin Ahmeti për pritjen dhe bashkëpunimin, duke shprehur interesim për mundësitë e investimit dhe bashkëpunimit me Komunën e Lipjanit.
