Kryetari i Komunës së Lipjanit z. Imri Ahmeti, sot ka pritur në takim Komandantin e Komandës Rajonale-Lindje (RC-E) të misionit të KFOR-it të udhëhequr nga NATO, Kolonel Sam Sargeant, me të cilin diskutoi për çështjet e sigurisë dhe bashkëpunimin institucional.
Gjatë takimit Kryetari Ahmeti, e falënderoi Kolonelin Sargeant për vizitën dhe vlerësoi lart rolin e KFOR-it dhe bashkëpunimin me Komunën e Lipjanit në ruajtjen e paqes dhe sigurisë ndër vite.
“Komuna e Lipjanit është një komunë e cila ka shënuar zhvillim të vazhdueshëm dhe ka potencial të madh për investime. Bashkëpunimi institucional me organet e sigurisë ka qenë gjithmonë prioritet, me qëllim krijimin e një ambienti të sigurt për të gjithë qytetarët tanë, për çka jemi mirënjohës edhe për rolin dhe kontributin e KFOR-it në ruajtjen e sigurisë”, tha Kryetari z. Imri Ahmeti.
Komandanti i Komandës Rajonale-Lindje të KFOR-it, Kolonel Sam Sargeant, falënderoi Kryetarin Ahmeti për pritjen dhe theksoi rëndësinë e takimeve me kryetarët e komunave, duke vlerësuar rolin e tyre në adresimin e nevojave të qytetarëve.
Komuna e Lipjanit mbetet e përkushtuar në forcimin e bashkëpunimit me institucionet e sigurisë, përfshirë KFOR-in.
