Kryetari i Komunës së Lipjan, z. Imri Ahmeti, sot ka pritur në takim ministren e Industrisë, Ndërmarrësisë dhe Tregtisë, znj. Mimoza Kusari-Lila, me të cilën kanë diskutuar për thellimin e bashkëpunimit institucional ndërmjet nivelit lokal dhe atij qendror.
Me këtë rast kryetari Ahmeti falënderoi ministren për vizitën, duke theksuar se Komuna e Lipjanit e ka prioritet zhvillimin e Parkut të Biznesit në Qylagë si një ndër projektet kryesore për zhvillimin ekonomik lokal.
“Përmes investimeve të vazhdueshme në këtë park, synojmë të krijojmë kushte sa më të favorshme për investitorët dhe bizneset prodhuese. Prioritet i yni mbetet tërheqja e sa më shumë kompanive që do të kontribuojnë në hapjen e vendeve të reja të punës dhe në rritjen e zhvillimit ekonomik në komunën tonë”, tha Kryetari, z. Imri Ahmeti.
Ndërsa ministrja Kusari-Lila falënderoi kryetarin Ahmeti për pritjen dhe vlerësoi krijimin e kushteve të favorshme për zhvillimin e bizneseve në Lipjan. Ajo theksoi gatishmërinë për bashkëpunim të mëtejmë ndërinstitucional, me qëllim fuqizimin e Parkut të Biznesit dhe mbështetjen e investimeve të reja.
Pas takimit kryetari Ahmeti dhe ministrja Kusari-Lila vizituan Parkun e Biznesit në Qylagë, ku panë nga afër zhvillimet dhe aktivitetin e bizneseve që tashmë kanë filluar operimin në këtë zonë. Ndër bizneset që operojnë në këtë park është edhe kompania Liga Steel, e cila aktualisht ka nisur procesin e prodhimit.
Në fund të takimit palët u dakorduan për vazhdimin e investimeve dhe thellimin e bashkëpunimit ndërmjet komunës dhe ministrisë, me fokus në zhvillimin ekonomik.
