Kryetari i Komunës së Lipjanit, z. Imri Ahmeti, sot, në sallën e Kuvendit Komunal, në përmbyllje të vitit 2025, mbajti një takim publik me qytetarë, të cilët i njoftoi për punët e realizuara, sfidat dhe të arriturat e komunës gjatë këtij viti që po e lëmë pas.
Kryetari Ahmeti u shpreh i kënaqur për trendin e investimeve të realizuara gjatë vitit 2025, e të cilat kanë ndikuar drejtpërdrejt në përmirësimin e jetës së qytetarëve të Komunës së Lipjanit. Ai e cilësoi vitin 2025 si një vit shumë të suksesshëm, duke ia atribuar këtë sukses qytetarëve të Lipjanit për bashkëpunimin e ndërsjellët.
Gjatë takimit me qytetarë, Kryetari Ahmeti vlerësoi të kënaqshëm realizimin e buxhetit të komunës për vitin 2025, i cili ka qenë i suksesshëm dhe se deri në fund të vitit pritet të arrijë deri në 95% të realizimit; investimet kapitale kanë arritur rreth 76% të realizimit. Ndërsa, të hyrat vetanake kanë shënuar progres të jashtëzakonshëm, duke tejkaluar planifikimin buxhetor.
“Deri më tani kemi realizuar mbi 60 projekte, por po i veçoj disa nga më të rëndësishmet, si: ndërtimi i QKMF-së në Lipjan, e cila sigurisht që do t’i përmirësojë kushtet dhe shërbimet për qytetarët tanë, ndërtimi i Shtëpisë së Kulturës, ndërtimi i vazhdimit të sheshit dhe parkut të qytetit, renovime të shkollave, asfaltime të rrugëve e shumë projekte të tjera”, tha Kryetari Ahmeti.
Ai theksoi se në sektorin e bujqësisë fermerët janë përkrahur përmes subvencioneve për pajisje të ndryshme të mekanizimit bujqësor, si dhe përmes formave të tjera të subvencioneve; po ashtu janë mbështetur edhe klubet sportive dhe OJQ-të e ndryshme lokale.
Ndër të tjera, Kryetari Ahmeti ka theksuar se Komuna e Lipjanit është renditur ndër komunat me performancë të mirë, sipas vlerësimeve nga organizata dhe institucione vendore e ndërkombëtare. Për transparencë buxhetore, Komuna e Lipjanit është renditur e para nga organizata GAP dhe ka marrë vlerësime të larta nga KDI dhe organizata të tjera.
Kryetari Ahmeti u shpreh i bindur se në vitin e ardhshëm do të realizohen edhe më shumë projekte, ndonëse përmendi edhe sfidat që kanë shoqëruar punën e deritanishme. Ndër sfidat kryesore, ai theksoi mungesën e mbështetjes nga niveli qendror dhe çështjet e lidhura me kontratat kolektive.
Qytetarët e pranishëm në takim shprehën mirënjohje për angazhimin e Kryetarit Ahmeti dhe kabinetit të tij për realizimin e projekteve të shumta që kanë ndikuar pozitivisht në zhvillimin e komunës. Ata gjithashtu paraqitën kërkesa për investime të reja kapitale në të ardhmen.
Në përmbyllje të takimit, Kryetari Ahmeti falënderoi të gjithë pjesëmarrësit dhe ritheksoi rëndësinë e komunikimit të drejtpërdrejtë me qytetarët si pjesë thelbësore e qeverisjes së hapur, gjithëpërfshirëse dhe transparente në shërbim të qytetarëve.
