Aktivitetet nisën në orët e paradites me homazhe pranë shtatores së Komandantit Legjendar Adem Jashari në qytetin e Lipjanit, aty ku nis kujtesa e gjallë e qëndresës sonë kombëtare.
Nën patronatin e Kryetarit të Komunës, z. Imri Ahmeti, në Sallën e Kuvendit u organizua Akademia Solemne në nderim të 12 qershorit, Ditës së Çlirimit, ku morën pjesë përfaqësues të institucioneve, familjarë të dëshmorëve, martirëve dhe qytetarë të shumtë.
Kryetari Ahmeti, në fjalën e tij para të pranishmëve, theksoi rëndësinë historike dhe emocionale të datës 12 qershor për qytetin e Lipjanit dhe për gjithë popullin shqiptar.
“Kjo ditë është më shumë se një përvjetor, është një përkujtim i rrugëtimit të lavdishëm drejt lirisë, një reflektim mbi sakrificën e brezave dhe një angazhim për të ardhmen tonë të përbashkët”, tha Kryetari Ahmeti.
Ai vlerësoi se liria e qytetit të Lipjanit dhe e Kosovës është rezultat i përpjekjeve të shumta e të përbashkëta, dhe se nuk është arritur pa sakrificë.
“Liria nuk na erdhi si dhuratë, ajo u fitua me përpjekje, me dhimbje dhe me gjak. Është rezultat i përkushtimit të patriotëve, dijetarëve dhe luftës heroike të Ushtrisë Çlirimtare të Kosovës, të mbështetur fuqishëm nga aleatët tanë ndërkombëtarë si SHBA-ja, NATO-ja dhe partnerët tanë të lirisë”, është shprehur Kryetari Ahmeti.
Kryetari Ahmeti theksoi gjithashtu rëndësinë që qyteti i Lipjanit i ka dhënë përjetësimit të figurave emblematike të rezistencës kombëtare.
“Në këtë përvjetor të 26-të të Çlirimit, ndjejmë krenari që qytetin tonë e nderon prania e shtatoreve të figurave të mëdha të lirisë dhe qëndresës, si shtatorja e Komandantit Legjendar Adem Jashari, si dhe ato të Ismet Asllanit, Arsim Zeqirit, Ruzhdi Shabanit, Haredin Bajramit dhe Xhavit Kozhanit”, ka thënë Kryetari Ahmeti.
Në përmbyllje të fjalës së tij, Kryetari Ahmeti shprehu zotimin institucional për vazhdimin e përkujdesjes ndaj historisë së lavdishme të popullit tonë, përmes projekteve konkrete që planifikohen të realizohen:
-Parku i Dëshmorëve dhe Martirëve
-Shtatorja e Presidentit Historik, Dr. Ibrahim Rugova
-Kulla-Muze e Veteranëve të UÇK-së
Kujtesa nuk është thjesht përkujtim, ajo është një obligim moral dhe atdhetar për të ndërtuar një shoqëri më të drejtë, më demokratike dhe më të bashkuar.
Urime Dita e Çlirimit, Lipjan!
Lavdi e përjetshme për të gjithë ata që dhanë jetën për lirinë e Kosovës!
