Sot në sallën e Kuvendit të Komunës së Lipjanit, u mbajt Seanca Inauguruese, në të cilën u bë betimi i Kryetarit të Komunës, z. Imri Ahmeti, para anëtarëve të rinj të Kuvendit dhe mysafirëve të pranishëm.
Mbledhja u drejtua nga anëtari më i vjetër i Kuvendit, z. Nexhmedin Lekiqi nga radhët e LDK-së. Gjatë seancës u bë betimi i 31 anëtarëve të rinj të Kuvendit, të zgjedhur në zgjedhjet lokale të mbajtura më 12 tetor 2025. Ndërsa, me 16 vota për, z. Daut Azemi u zgjodh kryesues i Kuvendit të Komunës së Lipjanit.
Në fjalimin e tij pas betimit, Kryetari Ahmeti shprehu mirënjohje dhe përkushtim për mandatin e ri, duke theksuar vlerësimin ndaj besimit që qytetarët i kanë dhënë për herë të katërt radhazi.
“Sot po fillojmë mandatin e ri me besimin e qytetarëve. Me përulësi dhe mirënjohje të thellë, i falënderoj të gjithë. Besimi për mandatin e katërt është nder i madh për mua dhe më motivon të punoj me ndershmëri, transparencë dhe përkushtim në shërbim të çdo familjeje, çdo lagjeje dhe çdo fshati të komunës sonë”, tha Kryetari z. Imri Ahmeti.
Ai shtoi se rezultati zgjedhor është përgjegjësi e madhe dhe nxitje për të vazhduar projektet zhvillimore që synojnë modernizimin dhe përparimin e Komunës së Lipjanit.
Në përmbyllje të fjalimit, Kryetari Ahmeti falënderoi qytetarët për mbështetjen e vazhdueshme. “Faleminderit nga zemra, Lipjan”.
