Me rastin e 14 Qershorit Ditës së Dëshmorëve të Komunës së Lipjanit, nën patronatin e Kryetarit të Komunës z. Imri Ahmeti, në Sallën e Kuvendit u mbajt Akademia Përkujtimore kushtuar dëshmorëve, në shenjë nderimi dhe mirënjohjeje për sakrificën e tyre për lirinë e Kosovës.
Në kuadër të aktiviteteve përkujtimore, paraprakisht u bënë homazhe pranë shtatores së Komandantit Legjendar Adem Jashari, ku familjarë të dëshmorëve, bashkëluftëtarë, përfaqësues institucionalë dhe qytetarë nderuan me respekt veprën dhe sakrificën e bijve dhe bijave të Lipjanit.
Në fjalën e tij para të pranishmëve, Kryetari i Komunës së Lipjanit z. Imri Ahmeti, theksoi se 14 Qershori zë një vend të veçantë në historinë dhe kujtesën kolektive të Lipjanit, duke nderuar sakrificën e dëshmorëve që u rreshtuan në anën e lirisë dhe u bënë pjesë e përjetshme e historisë sonë kombëtare.
“Liria e Kosovës nuk erdhi rastësisht, por u ndërtua mbi gjakun e dëshmorëve, luftën e drejtë të Ushtrisë Çlirimtare të Kosovës dhe mbështetjen e aleatëve ndërkombëtarë. Kujtimi për dëshmorët obligon secilin qytetar dhe institucion që të mos harrojë kurrë rrugën që na solli lirinë”, tha Kryetari z. Imri Ahmeti.
Ai theksoi gjithashtu se vlerat për të cilat u flijuan dëshmorët duhet të ruhen dhe të respektohen vazhdimisht, pa u përdorur për interesa të ngushta politike apo personale.
Në përmbyllje Kryetari Ahmeti, shprehu mirënjohjen dhe respektin më të lartë për familjet e dëshmorëve, duke theksuar se bijtë dhe bijat e tyre janë të gdhendur përgjithmonë në historinë e Lipjanit dhe të Kosovës, ndërsa kujtoi me nderim të gjithë dëshmorët dhe martirët e kombit, në krye me Adem Jasharin dhe familjen Jashari, simbol i qëndresës dhe sakrificës për liri.
Lavdi e përjetshme dëshmorëve të Lipjanit dhe të gjithë dëshmorëve e martirëve të kombit!
