Në 27-vjetorin e masakrave në Sllovi, Hallaq të Vogël dhe Ribar të Vogël, sot u mbajt akademi përkujtimore në nderim të martirëve dhe dëshmorëve të Komunës së Lipjanit.
Gjatë ditës u zhvilluan homazhe dhe u vendosën buqeta me lule pranë pllakave përkujtimore në Sllovi dhe Akllap, në shenjë nderimi për sakrificën e tyre për lirinë e vendit.
Me këtë rast Kryetari Ahmeti, theksoi se prilli i vitit 1999 mbetet një nga periudhat më të rënda në historinë e vendit, duke shtuar se ajo është dëshmi e krimeve çnjerëzore, por edhe e qëndresës dhe sakrificës për liri.
“Prilli i vitit 1999 mbetet një nga periudhat më të rënda në historinë e vendit, dëshmi e krimeve çnjerëzore, por njëkohësisht edhe e qëndresës dhe sakrificës për liri. Kujtimi për martirët dhe dëshmorët mbetet obligim moral dhe institucional, si dhe përgjegjësi e vazhdueshme për ruajtjen e vlerave të lirisë”, tha Kryetari z. Imri Ahmeti.
Ai theksoi se nderimi për ta nuk kufizohet vetëm në fjalë, por në përkushtim për një shoqëri të drejtë, me institucione funksionale dhe mirëqenie për qytetarët. Sfidat e sotme kërkojnë zgjidhje reale, pasi rinia nuk mbahet me fjalime, por me mundësi dhe drejtësi.
“Le të jetë kjo ditë jo vetëm kujtim, por edhe zotim për punë të ndershme, për zhvillim dhe për një shtet të drejtë e të qëndrueshëm”, tha Kryetari z. Imri Ahmeti.
Përfaqësuesit e familjeve të dëshmorëve dhe martirëve të Komunës së Lipjanit i ndanë Kryetarit Ahmeti një mirënjohje për kontributin në ruajtjen e kujtesës historike dhe vlerave të luftës çlirimtare.
Lavdi e përjetshme dëshmorëve dhe martirëve të Komunës së Lipjanit.
