Sot, në sallën e takimeve të Komunës së Lipjanit, u mbajt mbledhja e dytë për vitin 2026 e Këshillit Komunal për Siguri në Bashkësi (KKSB), në të cilën u diskutua për gjendjen e sigurisë në komunë dhe çështje të tjera me interes për sigurinë publike.
Nënkryetari i Komunës së Lipjanit dhe njëherësh kryesues i KKSB-së, z. Diamant Bytyqi, në fjalën hyrëse përshëndeti anëtarët e Këshillit dhe foli për situatën e përgjithshme të sigurisë publike në komunë.
Ai theksoi rëndësinë e bashkëpunimit ndërinstitucional dhe të aktiviteteve që ndikojnë në rritjen e vetëdijes së qytetarëve për çështjet që lidhen me sigurinë dhe mbrojtjen e interesit të përgjithshëm.
Shefi i Operatives në Stacionit Policor në Lipjan, z. Fehmi Haxholli, prezantoi pasqyrën e përgjithshme të gjendjes së sigurisë në komunë, duke vlerësuar se situata vazhdon të jetë e qetë dhe stabile.
Ai gjithashtu informoi anëtarët e Këshillit lidhur me rastin e fundit të ndodhur në fshatin Magurë, si dhe falënderoi institucionet komunale për bashkëpunimin dhe koordinimin e vazhdueshëm në ruajtjen e rendit dhe sigurisë publike.
Në këtë mbledhje, udhëheqësi i Njësisë së Zjarrfikësve në Lipjan, z. Sadri Shamolli, prezantoi raportin mbi intervenimet e realizuara gjatë kësaj periudhe.
Me theks të veçantë u diskutua për rritjen e rrezikut nga zjarret gjatë sezonit të verës, veçanërisht në periudhën e korrje-shirjeve.
Në këtë drejtim, KKSB-ja propozoj një rekomandim ku i bëhet thirrje të gjithë qytetarëve, fermerëve dhe operatorëve bujqësorë që të tregojnë kujdes maksimal, të shmangin ndezjen e zjarreve në ambiente të hapura dhe të respektojnë masat parandaluese, me qëllim të mbrojtjes së jetës, pronës dhe mjedisit.
Gjatë mbledhjes, anëtarët e KKSB-së diskutuan edhe për forcimin e koordinimit ndërinstitucional dhe rëndësinë e bashkëpunimit të vazhdueshëm ndërmjet institucioneve lokale dhe mekanizmave të sigurisë, me synim ruajtjen e sigurisë dhe mirëqenies së qytetarëve të Komunës së Lipjanit.
