Kryetari i Komunës së Lipjanit z. Imri Ahmeti, sot në sallën e Kuvendit ka mbajtur takim publik me qytetarët, me qëllim të prezantimit të punëve të realizuara gjatë gjashtëmujorit të parë të vitit 2026, si dhe për të dëgjuar nga afër kërkesat dhe propozimet e tyre lidhur me investimet dhe zhvillimin e komunës.
Gjatë takimit Kryetari Ahmeti, prezantoi realizimin e të hyrave vetanake, ku deri më tani është realizuar 48.32% e planifikimit vjetor. Veçanërisht u theksua realizimi i tatimit në pronë i cili ka arritur në 32.22%.
“Sa u përket projekteve kapitale, aktualisht janë në proces disa projekte, ku një pjesë e tyre është duke u zbatuar në terren, ndërsa të tjerat ndodhen në fazat e procedurave të tenderimit dhe përzgjedhjes së operatorëve, me pritshmëri që shumë shpejt të fillojnë punimet”, tha Kryetari, z. Imri Ahmeti.
Gjithashtu ai theksoi se përveç investimeve në infrastrukturë, prioritet i veçantë do t’u kushtohet edhe sektorëve të arsimit, shëndetësisë, bujqësisë, sportit, kulturës dhe rinisë, për të cilët janë realizuar projekte të rëndësishme dhe janë ndarë subvencione. Mbështetja për këta sektorë do të vazhdojë edhe në të ardhmen, me qëllim të përmirësimit të cilësisë së jetës së qytetarëve.
Qytetarët e pranishëm në takim shprehën mirënjohje për angazhimin e Kryetarit Ahmeti dhe kabinetit të tij në realizimin e projekteve të shumta. Ata gjithashtu paraqitën kërkesa për investime në të ardhmen krahas lokaliteteve të tyre e të cilat janë më me prioritet për ta.
Në përmbyllje të takimit Kryetari Ahmeti, falënderoi të gjithë pjesëmarrësit dhe ritheksoi rëndësinë e komunikimit të drejtpërdrejtë me qytetarët si pjesë thelbësore e një qeverisjeje të hapur, gjithëpërfshirëse dhe transparente, në shërbim të qytetarëve.
