Kryetari i Komunës së Lipjanit z. Imri Ahmeti, sot ka nënshkruar marrëveshje bashkëpunimi me drejtorin e Institutit për Edukim, Demokraci dhe Art – Edu De’Art z. Besart Zhuja, me qëllim të përfshirjes së qytetarëve në planifikimin dhe zhvillimin e hapësirave publike në Komunën e Lipjanit.
Marrëveshja parasheh krijimin e një Forumi të përbërë nga të rinj artistë, arkitektë dhe studiues të fushave sociale nga komuna e Lipjanit, i cili do të shërbejë si mekanizëm pjesëmarrës për identifikimin, analizimin dhe propozimin e ndërhyrjeve artistike dhe urbane në hapësirat publike të qytetit.
Në kuadër të këtij bashkëpunimi do të organizohen takime konsultative me qytetarë dhe akterë të tjerë, analiza të hapësirave publike, punëtori, vizita në terren, si dhe hartimi i koncepteve për ndërhyrje artistike dhe urbane në zona të ndryshme të komunës.
Ky aktivitet përkrahet nga programi i Fondacionit Kosovar për Shoqëri Civile (KCSF), bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.
