Kryetari i Komunës së Lipjanit z. Imri Ahmeti, sot ka marr pjesë në përurimin e librit “Rrugëtimi drejt lirisë 1941–1991”, vepër e autorit Sefer Tasholli, e cila trajton një nga periudhat më të rëndësishme të historisë së Kosovës dhe përbën botimin e tij të pestë me karakter publicistik.
Gjatë këtij përurimi kryetari Ahmeti, vlerësoi rëndësinë e dokumentimit të historisë dhe ruajtjes së kujtesës kolektive përmes veprave të tilla.
“Përurimi i librave që trajtojnë të kaluarën e vendit tonë është gjithmonë një nder i veçantë, sidomos kur kemi autorë që me përkushtim sjellin vepra me vlerë për historinë tonë. Këto libra mbeten dëshmi të rëndësishme dhe një referencë e qëndrueshme për brezat e ardhshëm. Si institucion do të vazhdojmë të mbështesim iniciativa që kontribuojnë në dokumentimin dhe ruajtjen e historisë sonë”, tha kryetari z. Imri Ahmeti.
Autori i librit z. Sefer Tasholli, u shpreh i lumtur që vepra e tij po promovohet pas një pune të gjatë dhe të përkushtuar në dokumentimin e ngjarjeve të viteve 1941–1991, duke falënderuar njëkohësisht bashkëpunëtorët dhe Komunën e Lipjanit për mbështetjen në realizimin e këtij botimi.
Libri trajton periudhën historike të Kosovës nga viti 1941 deri në vitin 1991, duke pasqyruar organizimet, demonstratat dhe zhvillimet politike e shoqërore në Komunën e Lipjanit, si pjesë e përpjekjeve të përgjithshme për çështjen e Kosovës.
