Nënkryetari i Komunës së Lipjanit, z. Diamant Bytyqi, së bashku me Kryesuesin e Kuvendit, z. Daut Azemi, dhe Drejtorin e Arsimit, z. Rasim Hasani, sot kanë pritur në një takim të veçantë nxënësit e ShFMU “Vëllezërit Frashëri”, të cilët u shpallën fitues në Panairin e Garave ASEF, të mbajtur në Tiranë.
Me këtë rast, Nënkryetari Bytyqi vlerësoi lart punën dhe rezultatet e nxënësve, duke theksuar se sukseset e tyre janë dëshmi e qartë e përkushtimit dhe cilësisë së arsimit në komunën tonë.
“Ju duhet të ndiheni vërtet krenarë, sepse sot keni bërë krenarë të gjithë qytetarët e Lipjanit. Rezultatet që keni arritur janë dëshmi e qartë se puna, përkushtimi dhe serioziteti shpërblehen gjithmonë. Secili prej jush, së bashku me mësimdhënësit dhe shkollën tuaj, e cila vazhdimisht arrin sukses në çdo garë, meritoni vlerësimin më të lartë. Komuna e Lipjanit do të vazhdojë t’ju mbështesë pa hezitim sa herë që paraqitet nevoja, sepse investimi në dije është investim i drejtpërdrejtë në të ardhmen e fëmijëve dhe të komunës sonë”, tha nënkryetari, z. Diamant Bytyqi.
Ndërsa drejtori i shkollës, z. Jakup Bahtiri, së bashku me nxënësit, ka shprehur falënderime për mbështetjen e vazhdueshme të Komunës së Lipjanit, e cila u ka mundësuar pjesëmarrjen në gara të rëndësishme si ASEF. Ai theksoi se ky bashkëpunim i përhershëm motivon shkollën që të vazhdojë me përkushtim dhe profesionalizëm, në mënyrë që së bashku me mësimdhënësit dhe nxënësit të përfaqësojnë denjësisht komunën në secilën garë brenda dhe jashtë vendit.
Shkolla “Vëllezërit Frashëri” këtë vit mori pjesë me 8 projekte inovative, duke arritur rezultate mbresëlënëse në disa fusha mësimore. Të gjitha projektet u vlerësuan me medalje, duke vazhduar traditën e suksesit, përkushtimit dhe cilësisë së kësaj shkolle.
Nga pjesëmarrja në ASEF 2025, shkolla siguroi: vendin e parë me medalje të artë në gjuhën shqipe dhe gjuhën angleze, një medalje të artë dhe një medalje të bronztë në gjuhën gjermane, një medalje të artë, një të argjendtë dhe një të bronztë në lëminë e gjeografisë si dhe një medalje të bronztë në histori. Këto arritje e konfirmojnë edhe një herë traditën e sukseseve të kësaj shkolle dhe përkushtimin e saj ndaj cilësisë në edukim.
