Gjatë këtij takimi, Kryetari Ahmeti dhe Major Kevin Dugas kanë biseduar rreth sigurisë në Komunën e Lipjanit, vizionit të së ardhmes, por edhe për punët të cilat janë duke u bërë në gjithë territorin e Komunës së Lipjanit, mundësi bashkëpunuese, si dhe çështje të tjera me rëndësi.
Me këtë rast, Kryetari Imri Ahmeti ka vlerësuar lart bashkëpunimin e shkëlqyeshëm ndërmjet komunës dhe KFOR-it, si dhe shprehu gatishmërinë që një bashkëpunim i tillë të vazhdojë edhe në të ardhmen me qëllim të ofrimit të një ambienti sa më të sigurt për qytetarët.
Nga ana tjetër, Komandanti i Komandës Regjionale – Lindje të KFOR-it Amerikan në Kampin “Bondsteel”, Major Kevin Dugas, ka përgëzuar Kryetarin Imri Ahmeti për punën dhe ka vlerësuar lart kontributin e tij në shërbim të qytetarëve, por në të njëjtën kohë ka ofruar edhe gatishmërinë e bashkëpunimit në realizimin e disa projekteve me rëndësi për qytetarët e Lipjanit.
Në fund të takimit, Kryetari Imri Ahmeti dhe Major Kevin Dugas, në shenjë respekti dhe mirënjohje për bashkëpunimin e ndërsjellë, kanë shkëmbyer stemën e Komunës së Lipjanit dhe një simbol nga KFOR-i Amerikan – Brigada e Kombësorisë.
