Komuna e Lipjanit ka vazhduar me mbajtjen e dëgjimeve buxhetore në kuadër të hartimit të Kornizës Afatmesme Buxhetore për periudhën 2026–2028, me qëllim përfshirjen aktive të qytetarëve në identifikimin e prioriteteve dhe nevojave zhvillimore të lokaliteteve.
Gjatë këtyre takimeve, qytetarëve u është dhënë mundësia të paraqesin propozimet, kërkesat dhe idetë e tyre për projektet që i konsiderojnë të rëndësishme për lokalitetin e tyre.
Drejtori për Buxhet dhe Financa në Komunën e Lipjanit, z. Latif Ramadani, theksoi rëndësinë e bashkëpunimit të drejtpërdrejtë me qytetarët, prezantoi pikat kryesore të buxhetit komunal dhe njëkohësisht potencoi rëndësinë e pjesëmarrjes së qytetarëve në këto takime, me qëllim të harmonizimit të projekteve sipas prioriteteve të tyre.
Komuna e Lipjanit mbetet e përkushtuar për një proces buxhetor gjithëpërfshirës, transparent dhe në shërbim të zhvillimit të qëndrueshëm.
Takimet u mbajtën në Grackë të Vjetër, Dobrajë e Madhe dhe Krojmir.
