Kryetari i Komunës së Lipjanit, z. Imri Ahmeti, ka pritur në takim nxënësin e talentuar të SHFMU “Vëllezërit Frashëri”, Adri Vila, i cili ka përfaqësuar me sukses Kosovën në finalen e Olimpiadës Ndërkombëtare STEM, të mbajtur në Barcelonë, një nga garat më prestigjioze në botë për fëmijë dhe të rinj.
Me këtë rast, kryetari Ahmeti e uroi Adrin për suksesin e arritur, duke e cilësuar atë si një nga shembujt më frymëzues të rinisë së Lipjanit.
“Jam i lumtur dhe krenar për sukseset e njëpasnjëshme të nxënësve tanë. Adri është dëshmi e potencialit të jashtëzakonshëm që kanë të rinjtë e Lipjanit. Si institucion, jemi të përkushtuar ta mbështesim çdo hap të rrugëtimit të tyre drejt dijes dhe sukseseve të reja”, tha kryetari, z. Imri Ahmeti.
Në këtë garë ndërkombëtare, Adri Vila ka shkëlqyer duke u vlerësuar me Medaljen e Artë në Kodim 
, Çmimin “Best of the Best” 
, si dhe Medaljen e Argjendtë në Shkencë 
, duke dëshmuar punën, përkushtimin dhe talentin e tij të jashtëzakonshëm. 
Në shenjë mirënjohjeje për përfaqësimin dinjitoz të Kosovës dhe Lipjanit, kryetari Ahmeti i dhuroi pllakatën e Komunës së Lipjanit.
